Monthly Archives: ஜனவரி 2007

ஜெயா டி.வி யில் மார்கழி மகோற்சுவம்

வருடா வருடம் மார்கழி மகோற்சுவம் ஜெயா டி.வி யில் சிறப்பாக நடந்தேறும். அமெரிக்காவில் இங்கே ஒளிபரப்பு இல்லாததால், இந்த வருட நிகழ்சிகளை பார்க்க இயலவில்லை. ஆனால் இசை ரசிகர்களில் தயவினால், இந்நிகழ்சிகளில் சில சேமிக்கப்பட்டு இணையத்தில் கேட்க கிடைக்கிறது. நீங்களும் இங்கே சென்று கேட்கவோ, தரவிறக்கம் செய்துகொள்ளவோ இயலும்.

ஓவ்வொரு கலைஞரும் ஒரு சிறப்பு தீம் எடுத்துக்கொண்டு பாடுவது சிறப்பு.
எல்லா கச்சேரிகளும் சிறப்பாக இருந்தன.

பிடித்த பாடல்களில் சில:
சுதா ரகுநாதன் – நீராஜனம்
நெய்வேலி சந்தானகோபாலன் – மதியால் வித்தகனாகி (திருப்புகழ்)
ப்ரியா ஸிஸ்டர்ஸ் – ஸ்ரீரங்கநாத குருசேவை
உன்னி கிருஷ்ணன் – பெற்ற தாய் தனை, விஸ்வேஸ்வர தரிசனு
ரஞ்சனி -காயத்ரி – அம்பரமே தண்ணீரே (திருப்பாவை)

இடையிடையே இரசிகர்கள் கேட்கும் கேள்விகளுக்கான பதில்களும் சுவாரஸ்யமாக இருந்தன.

பிடித்தவற்றில் சிலவற்றை தொகுத்துள்ளேன்:
கேள்வி: இருபது வருடங்களுக்கு முன் நீங்க பாடிய விதத்திற்கும் அப்படியே நிறைய மாறி இருக்கிறதே?
நெய்வேலி சந்தானகோபாலன்: எங்க குருநாதர் பெரிய மேரு மலையா இருந்தார். அவர் இருக்கிற வரை, அவரோட விஸ்வரூப தரிசனம் எப்பவுமே கிடைத்துக்கொண்டு இருந்ததிலே அப்படி இருந்தது. அப்புறம் நானும் பாடணும்னு வந்தபோது – நமக்கு சுவாமி என்ன கொடுத்து இருக்கிறார் – அவர் கிட்டே இருந்து நாம என்ன எடுத்துக்கொண்டு இருக்கோம் அப்படீன்னு ஆராய்ந்து ஆராய்ந்து – உள்ளே உள்ளே போய் வெளிய வரும்போது – ஒரு Simplicity – என்னோட natureக்கு தகுந்த மாதிரி ஒரு சங்கீதத்தை எடுத்துண்டுட்டேன்னு நினைக்கிறேன். இன்னும் ஒண்ணு, கேட்க வேண்டும் என்று நீங்களெல்லாம் இவ்வளவுதூரம் வந்திருக்கீங்களே – உங்களுக்கும் புரியணும்னு ஆசையா இருக்கு.

கேள்வி: சில பாடல்கள் மட்டும் ஏன் All time Greats ஆக இருக்கு?
ப்ரியா ஸிஸ்டர்ஸ்: அந்த பாடல்கள் பாடல் வரிகள் – சாகித்யம் simple ஆக இருக்கறதினால.

கேள்வி: இரண்டுபேர் சேர்ந்து, ராகத்தோட ஆலாபனை பண்ணறீங்க, ஆனால் ஆலாபனைங்கறது personal மனோதர்மம் இல்லையா – அதை எப்படி இரண்டு பேர் சேர்ந்து செய்ய முடியுது?
ப்ரியா ஸிஸ்டர்ஸ்: மனோதர்மம்-னு வரும்போது – தனித்தனியா – ராகம் பாதிப்பாதி பாடறோம் – நிரவல் ஒருத்தர் பாடினதுக்கு அப்புறம் இன்னொருவர் பாடறோம் – அதனால் சேர்ந்து பாடறதில்லை – மனோதர்மம் அவங்க அவங்க தனித்தனிதான்.

கேள்வி: ஒரு சச்சேரி எப்போது வெற்றிகரமானதுன்னு தெரியும்?
உன்னி கிருஷ்ணன்: தனி அவர்த்தனத்திற்கு அப்புறம், நல்ல ஒரு கிரஸண்டோவில் போய் முடியும்போது சொல்லலாம். ஆனால், கச்சேரி பாடிக்கொண்டு இருக்கும்போது இதைப்பற்றியெல்லாம் நினைப்பது கடினம். முடிந்த அப்புறம்தான் யோசிக்க முடியும். பாடகர் ஒரு inspiration உண்டாக்கி இருந்தால், வெற்றிகரமான கச்சேரி என்று சொல்லலாம்.

முடிவுரையில் ரஞ்சனி – காயத்ரி: ஆயிரக்கணக்கான இசை ரசிகர்களுக்கு டிசம்பர் சீசன் படு குஷி. ஆன, லட்சக்கணக்கான, கோடிக்கணக்கான – வர இயலாத ரசிகர்களுக்கு ஜெயா டி.வி வழியா இசை போய் சேரரது – அவர்களுக்கு மார்கழி மகா உற்சவம் – மெகா படு குஷி. மற்ற கச்சேரிகளை கவர் பண்ணறதைக்காட்டிலும் தாங்களே விழா நடத்துவது சிறப்பு. இப்போவெல்லாம், டிசம்பர் சீசன்ல பாடறீங்களான்னு கேக்கறாங்களோ இல்லையோ, ஜெயா டி.வி யில் பாடறீங்களான்னு கேக்கறாங்க!

Advertisements

6 பின்னூட்டங்கள்

Filed under இசை, ஜெயா டி.வி, jaya tv, Music

2006 டாப் டென் தமிழ் திரைப்பாடல்கள்

2006 அதற்குள் நிறைவடைந்து விட்டது. தமிழ்த் திரை இசையில் சொல்லிக் கொள்ளும்படியாக ஏதும் சிறப்பான பாடல்கள் வருவதற்கு முன்பாகவே 2006 சொல்லாமலே சொன்றுவிட்டது.

2006 இல் இளையராஜா, ஏ.ஆர் ரகுமான் மற்றும் ஹேரிஸ் ஜெயராஜ் ஆகியோரிடமிருந்து தலா இரண்டே படங்கள்தான். யுவன் சங்கர் ராஜா, டி. இமாம் மற்றும் ஸ்ரீகாந்த் தேவா ஆகியோர் அடுத்த தலைமுறை இசையமைப்பாளர்களாக வலம் வரும் கனவில் அதிகமான படங்களுக்கு இசையமைத்துள்ளனர்.  வித்யாசாகர், பரத்வாஜ், ஜோஷ் ஸ்ரீதர்,  ரமேஷ் விநாயகம்,  கார்த்திக் ராஜா ஆகியோர் ஏனைய இசையமைப்பாளர்கள்.  தரண்(பாரிஜாதம்), ஜீ.வி. பிரகாஷ்(வெயில்), சுந்தர் சி.பாபு (சித்திரம் பேசுதடி), பால் ஜே போன்ற புதியவர்களின் வரவையும் இந்த வருடம் கண்டது.

2005 ஆம் ஆண்டைப்போலவே, இந்த வருடமும் பார்முலா  படங்களில்  கானா பாடல்  கண்டிப்பாக திணிக்கப்படுவது தொடர்ந்தது. அவற்றில் சில ஹிட்டாகவும் செய்தது!. சில இசையமைப்பாளர்கள் ரீமிக்ஸ் பாடல்களை முயற்சித்துள்ளார்கள். ரீமிக்ஸ் பாடல்கள் இதுவரை தனி ஆல்பங்களாக மட்டும் வெளிவந்தது, இப்போது வெள்ளித் திரையிலும்! வழக்கமாக பாடல்கள் வெளிவரும்போது பாடல்களை கேட்டு, பிடித்த பாடல்களை தரவிறக்கம் செய்து சி.டி யில் சேமித்து வைப்பது வழக்கம். 2000 ஆம் ஆண்டில் இந்த பழக்கத்தை தொடங்கியபோது, முதல் இரண்டு ஆண்டுகளின் வருடத்திற்கு 6 சி.டி என கருக்குவதுண்டு (burn CD!). இப்போது கழுதை தேய்ந்து கட்டெரும்பாய் ஆகி விட்டது. சென்ற வருடக் கருக்கல் கணக்கு – 2. இந்த வருடம் அதுவும்போய் – ஒன்றே ஒன்று. இதற்கு இரண்டு காரணம் இருக்கலாம். ஒன்று இப்போது வரும் பாடல்கள் ஏதும் நல்ல பாடல்களாக இல்லாமல் இருக்கலாம். அல்லது இப்போது வரும் பாடல்கள் என்னுடைய ரசனைக்கு ஒவ்வாதவையாய் இருக்கலாம். For the sake of the Benefit of the doubt, Let’s assume the later!. இந்த வருடம் சிறப்பானதொரு பட ஆல்பம் வராமைக்கு இன்னொரு காரணம், சிறப்பானதொரு திரைப்படமோ/இயக்குனரோ இல்லாமையும் சொல்லலாம். We miss you Manirathnam!

இவ்வளவு முன்னுரை போதும், பதிவின் கருவிற்கு நகர்வோம். இது என் ரசனையில் 2006 இன் டாப் டென் பாடல்கள். இதில் கானா பாடல்கள் ஏதும் இருக்காது, அவற்றை ஹிட்லிஸ்டில் தேடவும், என் லிஸ்டில் அல்ல.

* முன்பே வா என் அன்பே வா (ஷ்ரேயா கோஷல், நரேஷ்) / சில்லென்று ஒரு காதல் / ஏ.ஆர்.ரஹ்மான்

துவக்கத்தில் வரும் கிடார் முன்னீடு மனதை கொள்ளைபோகச் செய்யும், அப்புறம் என்ன ஷ்ரேயா கோஷலின் உச்சரிப்பு எப்படி இருந்தால் என்ன! ஆனாலும் அவர் நன்றாக பாடியுள்ளார்.  ‘ரங்கோலி ரங்கோலி’ என்று ஒரு கோலாட்டத்தின் கலப்பும் உள்ளது.  நரேஷ் குரலும் இனிமை.  பாடல் வரிகளில் புதுமை ஏதும் இல்லாவிட்டாலும், இசையின் அழகான வரிசைகளில் கார்த்திகை தீபமாய் மின்னுகிறது இந்த பாடல்.  இரண்டாவது இடையூட்டில் வரும் பியானோ/வயலின் பாடலோடு இரண்டற கலந்துபோவதும் அழகு. பின்னணியில் வரும் ஹம்மிங் பாடலுக்கு மேலும் மெருகேற்றுகிறது.

* மஞ்சள் வெயில் (ஹரிஹரன், நகுல், விஜய்) / வேட்டையாடு விளையாடு / ஹேரிஸ் ஜெயராஜ்

ஹேரிஸ் ஜெயராஜின் வழக்கமான துள்ளல் ரிதம் நிறைந்த பாடல். எளிதான ட்யூனாக இருந்தாலும் ஹரிஹரனின் குரல் பாடலை எங்கேயோ கொண்டு செல்கிறது!. பாடலில் சரணத்திற்கு பின் பல்லவியை திருப்பிப்பாடும்போது முதன்மை பாடகர் (lead vocalist) பாடாமல் கோரஸாக (நகுல், விஜய்) பாடுவது வித்யாசம் தருகிறது. இரண்டாவது இடையூட்டில் ஹெவி மெட்டல் ஒலிகளைத்தொடர்ந்து சேக்ஸ் வாசிப்பது, மிருதுவாக இதமளிக்கிறது. கடைசியில் ‘ஹூஹூ’ என்ற குரலோடு இசைப்பதும் நன்று.

இதே படத்தில் இன்னொரு பாடல் “பார்த்த முதல் நாளே“. இந்த பாடலும் அழகான மெலடி – உன்னி மேனன், பாம்பே ஜெயஸ்ரீ சிறப்பாக செய்துள்ளார்கள் – சென்ற வருடத்தின் ‘சுட்டும் விழிச்சுடரே’ வை நினைவுபடுத்தும் பாடல்.  இந்த ஆண்டின் சிறந்த ஆல்பம் எதுவென்றால் ‘வேட்டையாடு விளையாடு’ – ஐயமில்லாமல்.

* தென்றல் என்னும் (மது பாலகிருஷ்ணா) / பாசக் கிளிகள் / வித்யாசாகர்

தொடக்க ஆலாபனையில் பாரதி பாடல் ‘எதிலும்…’ நினைவு படுத்தும். அழகான பாடல் வரிகள் கொண்டு மண்ணின் மணம் வீசும் இனிமையான பாடல். தமிழருக்கு தனிப்பெருமை தரும் நாதஸ்வர முழக்கங்கள் கேட்க இனிமை. தில்லானா சங்கதிகளைக் கேட்கும் போது ‘சீரோங்கும் தென் பழனி மலை மேவும் கோவலா…’ என்று பாடத் தோன்றுகிறது!

தென்றல் என்னும் தேரேறி தமிழ் மன்றம் வந்த முல்லை மலரே…” என்பதே பல்லவி.

*  உன்னைக்கண்டேனே முதல் (ஷ்ருதி, ஹரிசரண்) / பாரிஜாதம் / தரண்

மழையில் நனைந்து பாடும் பாடல்களுக்குத் தான் தமிழ்திரையில் பஞ்சமுண்டோ? இந்த பாடல் இசையில் இடி, மழையுடன் துவங்குகிறது. ஷ்ருதியின் குரல் இனிமையாகவும், இளமையான கீச்சுக்குரலாகவும் இருக்கிறது.  ஹரிசரண் காதல் படத்திற்குபின் அதே இனிமையில் இன்னமும்!.  ஹரிஷ் ராகவேந்திரா போல, ஹரிசரண் நிறைய பாடல்கள் பாடி புகழ்பெற அவருக்கு வாழ்த்துக்கள்.

* சரிகமபதநி சொல்லி (மதுமிதா, எஸ்.சரோஜா, அமீர்) / பருத்தி வீரன் / யுவன் சங்கர் ராஜா

சிறிய பாடலானாலும், மதுமிதாவின் குரல் காதுக்கு தேன். யுவன் கிராமியப் பாடலுக்கு இனிதாய் இசை அமைத்திருக்கிறார்.

வரிகளில் இருந்து:
ஏகப்பட்ட சரக்கிருக்குது வாய்வசந்தான் எங்கிட்ட,
வாங்கி நல்லா ஏத்துகுற காதிருக்கா உங்கிட்ட?

யுவன், காத்திருக்கும் காதிருக்கு எங்ககிட்ட, நல்ல இசையா போடுங்க அடுத்த வருடம்!

* ஏனோ இது ஏனோ (ஜெய்தேவ்) / கிழக்கு கடற்கரைச்சாலை / பால் ஜே

மழைத்துளிகளாய் விழும் இசையுடன் தொடக்கமே இனிமை. மூன்று நிமிடத்திற்கு குறைவான பாடலானாலும், பாடலில் உயிரோட்டத்திற்கு குறைவில்லை. இசையும், குரலும் ஜோடி சேர்ந்து நம் காதுகளில் தேனைத் தூவுகின்றன. ஜெய்தேவின் குரலை இதற்குமுன் கேள்விப்பட்டதில்லை. சில இடங்களில் இளையராஜாவின் குரலைப்போல் உள்ளது. பால் ஜே, புதியவர் – புதுமைகள் பல செய்ய வாழ்த்துக்கள்.

* முகிலே முகிலே (ஸ்ரீநிவாஸ்) / அரண் / ஜோஷ் ஸ்ரீதர்

ஸ்ரீநிவாஸ் குரலில் பாடல் கேட்பது, மயிலிறகில் தடவுவதுபோன்று இதமானது என்று சொன்னால் அதில் எள் அளவும் மிகை இருக்காது. நீங்களே கேட்டுப்பாருங்களேன். இந்த பாடலில் ஸ்ரீநிவாஸின் இரண்டாவது அவதாரமும் அவரோடு சேர்ந்து ட்யூட் பாடுகிறது – அதன் பெயர் புல்லாங்குழல்! ஜோஷ் ஸ்ரீதர் இந்த பாடலில் கொஞ்சமாவது வேறுபாடு காட்டியிருக்கிறார், அதனால் அவருக்கும் ஒரு சபாஷ்!

* சுடும் நிலவு சுடாத சூரியன் (உன்னி கிருஷ்ணன், ஹரிணி) / தம்பி / வித்யாசாகர்

ஹம் செய்ய வைத்து பல்லவியை திரும்ப திரும்ப நினைவில் நிறுத்தும் பாடல். இரு சிறப்பான பாடகர்களிடம் இருந்து சிறப்பானதொரு பாடல். முதல் இடையூட்டில் வயலின் வரிசையை மட்டும் கவனித்துப் பாருங்கள். உங்களுக்காகவே தனிப்பட்ட முறையில் வாசித்தது போலும் தோன்றும்!. இரண்டாவது இடையூட்டில் ஹம்மிங் மட்டுமே!

*  நெஞ்சில் வாழ்கிற / ஒரு பொண்ணு ஒரு பையன் / கார்த்திக் ராஜா

அழகான கவிதையை அழகான இசையுடன் சேர்த்து படித்தால் எப்படி இருக்கும்? இப்படித்தான் இருக்கும். கார்த்திக் ராஜா இசையில் அழகாக மலர்ந்திருக்கிறது இந்த குறிஞ்சி மலர். பாடகி (யாரது?!) குரலும் இனிமை.

* என் ஸ்வாசத்தில் காதலின் (கல்யாணி, மது பாலகிருஷ்ணா) / ஜெர்ரி / ரமேஷ் விநாயகம்

இன்னுமொரு ட்யூட்தான் என்றாலும், இந்த பாடலின் இசையில் ரமேஷ் விநாயகம் புல்லாங்குழலை துள்ளிக்குதிக்க வைத்திருப்பது அழகு.  இசையின் எளிமைக்கும், அழகிற்கும் இந்த பாடலை எடுத்துக்காட்டாக சொல்லலாம்!

ஆண்:  ” இங்கு காதல் என்பது கடவுள் என்றால் இதுவரை நானொரு நாத்திகனே…”  

பெண்: ” நம் மனமே கோவில், முத்தம் – திருநீர், பக்தன் – நீயே காதலனே…”
ஒரு உவமைக்கு, மூன்று உவமை பதிலாக வருகிறது!

Continue reading

2 பின்னூட்டங்கள்

Filed under இசை, டாப் டென், Music, top ten